MKURUGENZI Uwekezaji wa Kampuni ya GSM, Injinia Hersi Said, amesema kuwa ni aibu kwa timu hiyo kumaliza msimu bila ya kubeba kombe, huku akiahidi kupambana kulichukua Kombe la Azam Sports Federation.

Kauli hiyo ni salamu tosha kwa watani wao Simba wanaotarajiwa kupambana nao kwenye Uwanja wa Taifa jijini Dar es Salaam, Jumapili hii ukiwa ni mchezo wa nusu fainali.

Simba tayari mabingwa wa Ligi Kuu Bara msimu huu na jana Jumatano walikabidhiwa kombe lao baada ya kucheza dhidi ya Namungo kwenye Uwanja wa Majaliwa mkoani Lindi.

Akizungumza na Spoti Xtra, Said ambaye pia ni Mjumbe wa Kamati ya Usajili Yanga, alisema kuwa GSM haijawahi kushindwa, hivyo kama wadhamini watahakikisha wanafanya maandalizi makubwa ya timu yao kwa kuwafunga Simba na kuchukua kombe hilo.

Said alisema kuwa, Yanga ni kati ya klabu kubwa Afrika, hivyo ni aibu kwao kumaliza msimu huu bila ya kombe lolote, hivyo amewataka mashabiki wa timu hiyo kuungana kwa pamoja katika kuelekea mchezo wao dhidi ya Simba kwa kujitokeza uwanjani kuwasapoti wachezaji.

“Ni aibu kwa timu kubwa kama Yanga katika ukanda huu wa Afrika kushindwa kuchukua kombe, hivyo kama wadhamini tumepanga kufuta aibu hiyo kwa kuhakikisha tunafanya kila liwezekano lililokuwepo ndani ya uwezo wetu ili tuchukue ubingwa huu.

“Tumeandaa kambi nzuri na bonasi za wachezaji kuelekea mchezo ujao wa nusu fainali dhidi ya Simba, lengo ni kuwaongezea morali wachezaji ya kupambana ili malengo yetu ya kuchukua kombe hilo yatimie,” alisema Said.

AKIUKOSA mchezo wa jana Jumatano wa Ligi Kuu Bara dhidi ya Kagera Sugar, kiungo mchezeshaji fundi wa Yanga raia wa Rwanda, Haruna Niyonzima, ameibuka na kutamka kuwa mashabiki waondoe hofu kwani anaendelea vizuri kiafya na Mungu akijaalia atakuwepo sehemu ya kikosi kitakachowavaa Simba.

Kiungo huyo alishindwa kumaliza mchezo wa ligi dhidi ya Biashara United baada ya kuchezewa vibaya dakika ya kumi na kusababisha apate jeraha la goti ambalo limemuweka nje na kuzua hofu ya kuukosa mchezo wa nusu fainali ya Kombe la Azam Sports Federation utakaochezwa Jumapili hii.

Akizungumza na Spoti Xtra, Niyonzima alisema kuwa hivi sasa anaendelea vizuri huku akiendelea na matibabu ya majeraha yake ili kuhakikisha anakuwepo sehemu ya kikosi cha timu hiyo kitakachocheza dhidi ya Simba.

Niyonzima alisema kutokana na matibabu anayoendelea kuyapata, ana uhakika mkubwa wa kucheza pambano hilo, hivyo mashabiki waondoe hofu, kikubwa waendelee kumuombea ili apone vizuri.“Nafahamu umuhimu mkubwa wa mchezo wetu wa nusu fainali dhidi ya Simba ambao ni lazima tupate matokeo mazuri ya ushindi.

“Ninaamini matokeo mazuri ya ushindi yatatutengenezea rekodi na kubwa zaidi kwetu wachezaji ni kufuzu hatua ya fainali na hatimaye kulichukua kombe hilo ili tushiriki Kombe la Shirikisho Afrika msimu ujao.

“Wachezaji wote malengo yetu ni kuhakikisha tunalichukua kombe hilo ili tucheze michuano ya kimataifa kwa ajili ya sisi wachezaji tujitengenezee soko nje ya nchi ambayo ndiyo malengo yetu,” alisema  Niyonzima.

Wakati Niyonzima akitoa kauli hiyo, kuna hatihati ya nyota wengine wa Yanga kukosekana katika mchezo huo ambao ni Juma Abdul na Papy Tshishimbi, huku Balama Mapinduzi akikosekana rasmi. Hawa wote ni majeruhi.

Kocha wa Simba, Sven Vandenbroeck amegomea wachezaji wake kupanda gari la wazi lililoandaliwa maalum na uongozi wa klabu hiyo kwa lengo ka kutembeza kombe la ubingwa.

Simba iliwasili kwenye Uwanja wa Ndege wa kimataifa wa Julius Nyerere majira ya sa 2:40 asubuhi kisha kuendelea kukaa ndani mpaka pale walipoanza kutoka saa 9:18 asubuhi.
Kocha wa Simba ndiye aliyeanza kutoka nje ya vyumba vya uwanja huo na kuelekea upande yalipokuwa yamepaki magari ya mashabiki na gari maalum ambalo liliandaliwa kuwabeba wachezaji.

Kisha baada ya dakika moja akarudi tena ndani lakini wakati akiwa mlangoni akaonekana kuanza kuzozana na mwanadada Lispa Hatibu ambaye ni msaidizi wa ofisa Mtendaji mkuu wa Simba Senzo Mazingisa.

Mabishano hayo yalidumu kwa dakika moja kabla ya wahudumu wa uwanja na kocha msaidizi wa Simba Seleman Matola kuwasihi waache ndipo Lispa alipoamua kuondoka kwa hasira huku akifoka.

Inadaiwa chanzo cha mzozo huo ni Sven kugoma wachezaji kupanda gari la wazi ambalo lilipangwa kupita katika barabara mbalimbali za Dar es Salaam mpaka makao makuu ya klabu hiyo Msimbazi huku yeye akitaka timu kwenda moja kwa moja kambini kujiandaa na mechi ya nusu fainali ya Kombe la FA dhidi ya Yanga itakayofanyika Jumapili.

JOHN Bocco, nahodha wa Simba ambao ni Mabingwa wa Ligi Kuu Tanzania Bara mara tatu mfululizo amesema kuwa kikubwa kilichowapa ushindi mapema ni ushirikiano wa wachezaji,  benchi la ufundi pamoja na sapoti ya mashabiki.

Simba imetwaa taji la ligi msimu wa 2019/20 ikiwa na mechi sita mkononi baada ya kufikisha jumla ya pointi 79 ambazo hazitafikiwa na timu yoyote, kwa sasa ikiwa imecheza mechi 34 ina pointi 81.

Jana, Julai 8 ilikabidhiwa Kombe hilo ambalo litakuwa kwenye makabati yao jumla baada ya kumalizana na Namungo FC mchezo wa ligi uliochezwa Uwanja wa Majaliwa na dakika 90 kukamilika kwa sare ya bila kufungana.

Bocco amesema:"Ushirikiano mkubwa kuanzia Kwenye benchi la ufundi ambao tunapata wachezaji pamoja na ushirikiano kwa kila mchezaji umechangia kwa kiasi kikubwa kwetu kuweza kutwaa ubingwa mapema.

"Sapoti ya mashabiki pia imekuwa ikitupa nguvu katika kufanya yale ambayo tumeweza hivyo haikuwa kazi rahisi kufikia hapa lakini tunamshukuru Mungu."

Leo Simba inarejea Dar kutoka Lindi majira ya saa mbili ambapo itaendeleza sherehe za ubingwa kwa kutembea na Kombe kwenye gari la wazi.

BERNARD Morrison, kiungo mshambuliaji ndani ya Klabu ya Yanga amerejea na makali yake yaleyale ya siku zote jambo ambalo limempa tabasamu Kocha Mkuu wa Yanga, Luc Eymael.

Morrison alikuwa kwenye mvutano na uongozi wa Yanga kuhusu ishu ya mkataba ambapo yeye alikuwa anadai kuwa ana dili la miezi sita huku uongozi ukiweka wazi kuwa ana dili la miaka miwili.

Shauri hilo lilipelekwa Shirikisho la Soka Tanzania, (TFF) ambao waliweka wazi kuwa Morrison ni mchezaji halali wa Yanga na anapaswa aendelee kuitumikia Klabu hiyo kwa kuwa ana mkataba nayo.

Hakuwa sehemu ya kikosi kilichomenyana na Biashara United Uwanja wa Karume, kwenye sare ya bila kufungana Julai 5, kuumia kwa Haruna Niyonzima na umuhimu wa mechi dhidi ya Simba, Julai 12 kulimfanya Eymael awaambie viongozi wa Yanga wampe tiketi Morrison akamalizane na Kagera Sugar.

Jana, Julai 8, kwenye mchezo wa ligi dhidi ya Kagera Sugar, Morrison alifunga bao pekee la ushindi dakika ya 78 na kuifanya Yanga kusepa na pointi tatu muhimu baada ya dakika 90 kukamilika kwa ushindi wa bao 1-0.

Eymael amesema kuwa alitumia muda mwingi kuongea na Morrison jambo ambalo limempa matumaini katika mechi ambazo zimebaki.

"Nimeongea na Morrison muda mrefu na kujua kwamba kuna mambo ambayo yapo kwenye kichwa chake, mengine sina uwezo wa kuyazungumzia kwa kuwa yatazungumzwa na viongozi.

"Kwangu mimi alichoniambia ni kwamba yupo tayari kucheza na nina amini yupo tayari kwani ni mchezaji wa Yanga," amesema.

Machi 8, Morrison alimtungua Aishi Manula wakati Yanga ikishinda bao 1-0 kwenye mchezo wa Ligi Kuu Bara, ana jumla ya mabao matano ambapo manne amefunga kwenye ligi na moja kwenye Kombe la Shirikisho.

Luis Suarez akishangilia baada ya kuifungia Barcelona bao pekee dakika ya 56 ikiwalaza Espanyol 1-0 katika mchezo wa La Liga usiku wa jana Uwanja wa Camp Nou ambao kila limpoteza mchezaji mmoja kwa kadi nyekundu. Barcelona inafikiisha pointi 76 baada ya kucheza mechi 35, ingawa inabaki nafasi ya pili nyuma ya Real Madrid yenye pointi moja zaidi na mechi mkononi, wakati Espanyol inaendelea kushika mkia na pointi zake 24 za mechi 35 sasa PICHA ZAIDI GONGA HAPA
 

Wachezaji wa Manchester City wakifurahia ushindi wa 5-0 dhidi ya Newcastle United usiku wa jana Uwanja wa Etihad, mabao ya Gabriel Jesus dakika ya 10, Riyad Mahrez dakika ya 21, Federico Fernandez aliyejifunga dakika ya 58, David Silva dakika ya 65 na Raheem Sterling dakika ya 90 na ushei. Kwa ushindi huo Manchester City inafikisha pointi 69, ingawa inabaki nafasi ya pili nyuma ya mabingwa tayari, Liverpool wenye pointi 92 baada ya wote kucheza mechi 34 PICHA ZAIDI GONGA HAPA

Mohamed Salah (wa pili kushoto) akipongezwa na wenzake, Naby Keita (kushoto), Roberto Firmino na Alex Oxlade-Chamberlain baada ya kuifungia Liverpool mabao mawili dakika ya sita na 76 katika ushindi wa 3-1 dhidi ya wenyeji, Brighton & Hove Albion kwenye mchezo wa Ligi Kuu ya England usiku wa jana Uwanja wa Amex. Bao lingine la Liverpool lilifungwa na Jordan Henderson dakika ya nane, wakati bao pekee la Brighton lilifungwa na Leandro Trossard dakika ya 45. Kwa ushindi huo, Liverpool ambao ni mabingwa tayari, wanafikisha pointi 92, sasa wakiwazidi pointi 23 Manchester City wanaofuatia baada ya kucheza mechi 34 PICHA ZAIDI GONGA HAPA

Na Mwandishi Wetu, RUANGWA
MABINGWA kwa mara ya tatu mfululizo, Simba SC leo wamelazimishwa sare ya bila kufungana na wenyeji, Namungo FC katika mchezo wa Ligi Kuu ya Tanzania Bara Uwanja wa Majaliwa, Ruangwa mkoani Lindi.
Sare hiyo ya tatu mfululizo na ya bila mabao, inaifanya Simba SC ifikishe pointi 81 baada ya kucheza mechi 34 na sasa inawazidi pointi 19 Azam FC na 20 Yanga SC wanaofuatia nafasi ya pili na ya tatu. 
Baada ya mchezo huo uliochezeshwa na refa Hamdani Said wa Mtwara aliyesaidiwa na Credo Mbuya wa Mbeya na Abdallah Lisakasa wa Lindi, kikosi cha Simba SC kimekabidhiwa Kombe lao la ubingwa wa Ligi Kuu ambalo litakuwa la kwao moja kwa moja kutokana na kulitwaa mara tatu mfululizo. 
Hilo linakuwa taji la 21 la Ligi Kuu kwa Simba SC baada ya awali kubeba taji hilo katika misimu ya 1965, 1966, 1973, 1976, 1977, 1978, 1979, 1980, 1984, 1990, 1994, 1995, 2001, 2003, 2004, 2007 (Ligi Ndogo), 2010, 2012, 2018 na 2019.
Vigogo, Yanga SC wanabaki kuwa mabingwa mara nyingi zaidi wa taji hilo, 26 katika misimu ya 1968, 1969, 1970, 1971, 1972, 1974, 1981, 1983, 1985, 1987, 1991, 1992, 1993, 1996, 1997, 1998, 2002, 2005, 2006, 2008, 2009, 2011, 2013, 2015, 2016 na 2017.
Timu nyingine zilizobeba taji hilo ni Cosmopolitans ya Dar es Salaam 1967, Mseto SC ya Morogoro 1975, Pan African ya Dar es Salaam 1982, Tukuyu Stars ya Mbeya 1986, Coastal Union ya Tanga 1988, Mtibwa Sugar ya Morogoro 1999 na 2000 na Azam FC 2014.
Kikosi cha Namungo kilikuwa; Nourdine Balora, Miza Christom, Edward Manyama, Stephen Duah, Carlos Protas, Hamisi Khalifa, Hashim Manyanya/Jamal Issa dk73, Steve Nzigamasabo, Bigirimana Blaise/John Kelvin dk31, Lucas Kikoti na Abeid Athumani.
Simba SC; Beno Kakolanya, Haruna Shamte/Hassan Dilunga dk63, Mohammed Hussein ‘Tshabalala’, Yussuf Mlipili, Tairone Santos/Gardiel Michael dk52, Said Hamisi, Miraji Athumani ‘Madenge’, Muzamil Yassin, Meddie Kagere, Ibrahim Ajibu/Cyprian Kipenye dk71 na Francis Kahata/Deo Kanda dk63.

Mshambuliaji Zlatan Ibrahimovic akishangilia na Franck Kessie baada ya AC Milan kutoka nyuma na kuichapa Juventus 4-2 katika mchezo wa Serie A usiku wa jana Uwanja wa Giuseppe Meazza Jijini Milan. Mabao ya AC Milan yalifungwa na Zlatan Ibrahimovic dakika ya 62, Franck Kessie dakika ya 66, Rafael Leao dakika ya 67 na Ante Rebic dakika ya 80 baada ya Juventus kutangulia kwa mabao ya Adrien Rabiot dakika ya 47 na Cristiano Ronaldo dakika ya 53. Kwa ushindi huo, AC Milan inafikisha pointi 49 baada ya kucheza mechi 31 na kuoanda kwa nafasi mbili hadi ya tano, sasa ikizidiwa pointi 14 na Atalanta inayoshika nafasi ya nne, wakati Juventus inabaki kileleni na pointi zake 75, sasa ikiizidi saba Lazio baada ya wote kucheza mechi 31 PICHA ZAIDI GONGA HAPA

Tammy Abraham akipongezwa na wenzake baada ya kuifungia Chelsea bao la tatu dakika ya 71 ikiwalza wenyeji, Crystal Palace 3-2 usiku wa jana katika mchezo wa Ligi ya England Uwanja wa Selhurst Park. Mabao mengine ya Chelsea yalifungwa na Olivier Giroud dakika ya sita na Christian Pulisic dakika ya 27, wakati ya Crystal Palace yalifungwa na Wilfried Zaha dakika ya 34 na Christian Benteke dakika ya 72. Kwa ushindi huo, Chelsea inafikisha pointi 60 baada ya kucheza mechi 34 na kupanda nafasi ya tatu, sasa ikizidiwa pointi sita na Manchester City wanaoshika nafasi ya pili PICHA ZAIDI GONGA HAPA

Jamie Vardy akishangilia baada ya kuifungia bao la kusawazsisha Leicester City dakika ya 84 ikitoa sare ya 1-1 na Arsenal iliyotangulia kwa bao la Pierre-Emerick Aubameyang dakika ya 21 katika mchezo wa Ligi Kuu ya England usiku wa jana Uwanja wa Emirates. Arsenal ilimaliza pungufu baada ya Eddie Nketiah kutolewa kwa kadi nyekundu dakika ya 74, dakika nne tu tangu aingie kuchukua nafasi ya Alexandre Lacazette. Leicester inafikisha pointi 59 baada ya sare hiyo katika mchezo wa 34 na sasa inashuka hadi nafasi ya nne ikizidiwa pointi moja na Chelsea, wakati Arsenal inayofikisha pointi 50 baada ya kucheza mechi 34 pia inabaki nafasi ya saba PICHA ZAIDI GONGA HAPA

BEKI kiraka wa Simba, Shomari Kapombe hataonekana tena uwanjani kwenye timu hiyo msimu huu.Kiraka huyo alipata maumivu katika mchezo wa Ligi Kuu Bara uliowakutanisha Simba na Azam FC uliopigwa wiki moja iliyopita baada ya kuchezewa vibaya na kiungo Frank Domayo.

Kapombe tayari amekosa mchezo mmoja wa ligi waliocheza na Ndanda FC, uliopigwa Nangwanda Sijaona huko mkoani Mtwara kabla ya leo kucheza mwingine dhidi ya Namungo FC na anatarajiwa pia kukosa mchezo wa Jumapili dhidi ya Yanga kwenye FA.

Kwa mujibu wa daktari mkuu wa timu hiyo, Yassin Gembe beki huyo baada ya kufanyiwa kipimo cha MRI, ameonekana kupata majeraha yatakayomuweka nje ya uwanja kwa muda wa wiki nne.

Gembe alisema kuwa beki huyo alifanyiwa vipimo hivyo kwenye hospitali ya Muhimbili.Aliongeza kuwa beki huyo baada ya majibu ya vipimo hivyo hivi sasa anaendelea matibabu huku jopo la madaktari wa timu hiyo wakimweka chini ya uangalizi ili kuhakikisha kabla ya ligi awe amepona tayari kuipambania timu yake.

"Kapombe hatakuwepo katika sehemu ya kikosi chetu katika michezo tuliyoibakisha ya ligi na Kombe la FA ni baada ya vipimo vya daktari kutoka kwa madaktari kuonyesha kuwa hawezi kuwa fi ti hivi karibuni.

“Majibu ya MRI yaliyotoka baada ya kipimo hicho ameonekana kupata majeraha katika sehemu ya goti lake, hivyo atatakiwa kukaa nje ya uwanja kwa muda wa wiki nne.

“Kama unavyofahamu ligi imebakia kama wiki mbili ili imalizike, hivyo hadi ligi inamalizika Kapombe anakuwa bado hajapona, kama kuonekana ataanza kuonekana msimu ujao,” alisema Gembe.

BEKI wa kushoto wa Simba,
Mohammed Hussein ‘Tshabalala’ aliachwa hotelini na basi la timu hiyo Jumamosi jioni walipokuwa wanakwenda Uwanja wa Nangwanda Sijaona kufanya mazoezi mepesi ya kujiandaa dhidi ya na Ndanda FC.

Kocha wa Simba, Sven Vandenbroeck aliwataka wachezaji wote kuwa ndani ya basi kabla ya saa 9:40 alasiri, na baada ya hapo wataanza safari ya kwenda katika uwanja wa mazoezi.

Tshabalala alitoka katika chumba chake ndani ya hoteli waliyofikia Simba na kufika katika basi saa 9:40, lakini Sven alikataa asifunguliwe mlango huku akiamrisha basi hilo liondoke na kumuacha nahodha huyo msaidizi nje akishangaa.

Taarifa ambazo Mwanaspoti lilizipata ni kuwa baadhi ya wachezaji walimwambia Tshabalala apande bodaboda awafuate, lakini alikataa na kurudi katika chumba chake kulala na hata kwenye mechi Sven alimtupa jukwaani.

Meneja wa Simba, Patrick Rweyemamu alisema saa 9:40 ni muda uliopangwa basi kuondoka kambini kuwapeleka wachezaji mazoezini, lakini mpaka muda wa gari kuondoka mchezaji huyo alikuwa hajaingia.

KIPA wa zamani wa Simba, Yanga na Taifa Stars, Ivo Mapunda, amemshauri kipa wa Simba, Beno Kakolanya, kuondoka klabuni hapo na kutafuta changamoto mpya kwenye timu nyingine ili kukinusuru kiwango chake.

Kakolanya amekosa nafasi ya kudumu kwenye kikosi cha kwanza cha timu hiyo, kuanzia alipojiunga nayo akitokea Yanga huku langoni akikaa Aishi Manula.

Akizungumzia ishu hiyo, Mapunda ambaye aliwahi kuwa kipa wa Simba na Yanga kwa vipindi tofauti amemshauri Kakolanya kutafuta changamoto nyingine nje ya Simba kwa kuwa uwezo wake unamruhusu kucheza timu nyingine na akarudisha makali yake ya zamani kuliko kung’ang’ania Simba ambapo hapati nafasi.

“Mimi ningemshauri Beno atafute changamoto mpya nje ya Simba kwa sababu unaona hata sasa ambapo tayari Simba ni mabingwa na mechi zilizobaki hawana presha ya matokeo lakini hapangwi ujue kuna tatizo hapo.

“Beno ni kipa mzuri na ana uwezo mkubwa wa kucheza timu nyingine kwa mafanikio kuliko kukomaa ndani ya Simba ambapo hana uhakika wa namba,” alisema Mapunda ambaye ametumika Taifa Stars kwa muda mrefu.

Siku chache kabla ya kuvaana na Simba kwenye nusu fainali ya Kombe la Shirikisho la Azam, Yanga imepata nguvu baada ya kurejea kundini kwa kiungo Mohamed Issah 'Banka'.
Mechi hiyo itachezwa katika Uwanja wa Taifa jijini Dar, Jumapili, Julai 12.

Kiungo huyo hajaichezea Yanga tangu ligi iliposimama Machi 17 kutokana na agizo la serikali la kusimamisha shughuli za michezo kama njia za kukabiliana na kusambaa kwa virusi vya corona.

Banka ameungana na kambi ya timu hiyo leo asubuhi na baada ya hapo akawa miongoni mwa wachezaji waliohudhuria mazoezi ya mwisho leo jioni kwenye Uwanja wa Kaitaba, Kagera kabla hawajaivaa Kagera Sugar kesho.

Kitendo cha Yanga kuhakikisha kiungo huyo anaungana na wenzake haraka ni wazi kwamba kinaashiria inautazama zaidi mchezo dhidi ya Simba ambao umeshikilia tiketi yao pekee iliyobakia ya kuwakilisha nchi katika mashindano ya kimataifa msimu ujao.

Yanga imejikuta ikikabiliwa na mzimu wa majeruhi baada ya baadhi ya wachezaji wake tegemeo kupata majeraha siku chache kabla ya kuwavaa Simba.

SINTOFAHAMU kubwa imeibuka katika benchi la ufundi la Simba baina ya Kocha Mkuu, Sven Vandenbroeck na mastaa wanane wa timu hiyo akiwemo straika namba moja, Meddie Kagere.

Mpaka kufikia leo, Kagere ametimiza siku 118 ambazo ni sawa na saa 2,808 bila kufunga bao lolote kwenye mechi za mashindano. Mara ya mwisho alitupia mabao manne dhidi ya Singida United timu yake ilipoibuka na ushindi wa mabao 8-0.

Kagere aliyemaliza msimu uliopita katika Ligi Kuu akiwa na mabao 23, licha ya kushindwa kufunga bao lolote tangu kurejea kwa msimu wa ligi amekuwa hachezi kikosi cha kwanza mara kwa mara.

Taarifa za ndani ya Simba zinasema kuna hali ya sintofahamu baina ya locha na mastaa hao, ingawa amekuwa mgumu kuzifafanua.

Kwa mujibu wa taarifa hizo, mbali ya Kagere, kocha na benchi lake hawapo vizuri na Ibrahim Ajibu, Deo Kanda, John Bocco, Yusuph Mlipili, Beno Kakolanya, Sharaf Shiboub na wikiendi iliyopita ameongezeka kwenye idadi hiyo Mohammed Hussein ‘Tshabalala.

Mwanaspoti limedokezwa kwamba ishu ya Kagere imefikia hatua mbaya kwani amewadokeza marafiki zake kwamba hafurahishwi na uamuzi wa kumsotesha benchi huku akiwa hana tatizo la kiafya.

MAJERAHA yaliyowakumba wachezaji Juma Abdul na Papy Kabamba ‘Tshishimbi’ yanaweza kuiathiri timu hiyo kuelekea mchezo wao wa nusu fainali ya FA dhidi ya Simba Jumapili.

Katika mchezo huo huenda kiungo, Tshishimbi akaukosa kutokana na majeraha aliyoyapata siku chache zilizopita ambapo jana alithibitisha kwamba amegundulika kuwa na tatizo kwenye goti, ila anaomba Mungu amponye haraka.

Kwa mujibu wa daktari wa klabu hiyo, Shecky Mngazija wachezaji Juma Abdul na Tshishimbi majeraha yao ni makubwa huku kwa upande wa wachezaji wengine ni yake ya kawaida.

Alisema katika mchezo wao wa juzi dhidi ya Biashara United mjini Musoma wachezaji wake walichezewa rafu za makusudi akiwemo Haruna Niyonzima ambaye hakuweza kuendelea na mchezo huo ndani ya dakika nane tu za mchezo.

Alisema kwamba mbali na Niyonzima wachezaji wengine waliochezewa rafu katika mchezo huo ni Said Juma Makapu, Juma abdul pamoja na Kelvin Yondani.

“Yaani mchezo na Biashara kulikuwa na rafu za makusudi, wachezaji wangu wameumiaumia miguu na magoti, sasa wengine wanaendelea vizuri, tunapambana ili watumike mechi ijayo na Kagera (Sugar), ila Juma majeraha yake katika mguu yanahitaji uangalizi zaidi,” alisema na kuongeza kuwa Niyonzima aliumizwa katika goti, lakini anaendelea vizuri. Yanga inatarajia kucheza na Kagera Sugar kesho mjini Bukoba.

KAMATI ya Katiba, Sheria na Hadhi za wachezaji ya Shirikisho la Soka nchini (TFF) imesema kwamba hakuna mchezaji aliyeruhusiwa kucheza ligi bila ya kuwa na mkataba, hivyo kauli ya Bernard Morrison kuwa alicheza mechi mbili bila mkataba ni uongo.

Kamati ya katiba, sheria na hadhi ya wachezaji ya  TFF imesema kwamba hakuna mchezaji aliyeruhusiwa kucheza ligi kuu bila ya kuwa na mkataba.

Kauli hiyo imetolewa na mwenyekiti wa kamati hiyo, Elius Mwanjala, ametoa kauli hiyo akitolea ufafanuzi alichokisema mchezaji Bernard Morrison kuwa aliitumikia Yanga katika michezo miwili bila ya kuwa na mkataba.

Mwanjala amesema kauli ya Bernard Morrison ni ya uongo kwa kuwa utaratibu wa wachezaji wote kucheza Ligi Kuu unafahamika, ni lazima awe na mkataba ili kupata usajili na uhalali wa kucheza ligi kuu.

Kuhusu  masuala ya mkataba wa Morrison, Mwanjala amesema wanasubiri kupokea baadhi ya nyaraka kutoka Yanga ili kufahamu uhalali wa mkataba wa miaka miwili ambao mchezaji anakana kuwa hajausaini.

Hata hivyo kamati hiyo imekiri kuipokea mikataba ya miezi sita na miaka miwili ya mchezaji huyo lakini wanasubiri kikao cha mwisho kuzipitia nyaraka zitakazowasilishwa na Yanga.

Katika hatua nyingine mwenyekiti huyo amesema wanaendelea kushughulikia malalamiko ya Yanga ambao waliyafikisha  katika kamati yao juu ya moja ya klabu nchini kutumika kumrubuni mchezaji wao Bernard Morrison kiasi cha kuukana mkataba wao.

Vilevile kamati imesema itatoa hukumu ya pamoja dhidi ya Makamu Mwenyekiti wa Yanga, Fredrick Mwakalebela, ambaye amelalamikiwa kuleta taharuki ndani ya Wekundu wa Msimbazi kwa kutangaza katika vyombo vya habari kuwa wamekamilisha mazungumzo na kiungo wao Clautius Chama, kinyume na utaratibu.

MSHAMBULIAJI wa Barcelona na timu ya taifa ya Argentina, Lionel Messi anatarajia kumaliza kufanya kazi na maisha ya soka kwenye klabu ya Barcelona, amesema Rais wa klabu hiyo Josep Maria Bartomeu.

Bartomeu amekanusha ripoti zilizodai kuwa Muargentina huyo mwenye umri wa miaka 33, alikataa kuongeza mkataba wake unaomalizika mwaka 2021. Bartomeu amesema kuwa moja ya wachezaji alioongea nao na kumthibitishia kuendelea kubaki Barcelona, ni pamoja na Lionel Messi.

Amezungumza hayo wakati timu yake ilipoondoka na ushindi wa 4-1 dhidi Villareal, Jumapili iliyopita, ushindi unaoifikisha Barca kwenye alama 73 nyuma ya vinara wa La Liga Real Madrid wenye alama 77, ikiwa imebaki michezo minne ligi kuhitimishwa.