YANGA YAPOROMOKA TARATIBU, SIMBA WAPANDISHA PRESHA

HALI imeanza kuwa ya wasiwasi ndani ya kikosi cha Yanga huku timu hiyo ikionekana kuporomoka taratibu kutokana na kuongezeka kwa idadi ya majeruhi.

Wakati Yanga wakipambana kurejesha uimara wao, wapinzani wao wakubwa Simba wameanza kupandisha presha kwa kasi ya ushindani, jambo linaloongeza uzito katika mbio za ubingwa wa Ligi Kuu Tanzania Bara.

Katika siku za hivi karibuni, Yanga imelazimika kuingia kwenye michezo kadhaa ikiwa na mapungufu makubwa ya baadhi ya nyota wake muhimu.

Hali hiyo imeibua maswali kuhusu uimara wa kikosi hicho katika kipindi hiki muhimu cha msimu, hasa ikizingatiwa ushindani mkali kutoka kwa timu pinzani.

Uongozi wa klabu hiyo umeweka wazi hali ya majeruhi kupitia taarifa ya jopo la madaktari, ukibainisha kuwa jumla ya wachezaji wanne wanapitia changamoto za kiafya.

Majina yaliyotajwa ni Ibrahim Abdulla ‘Bacca’, Laurindo Dilson ‘Depu’, Chadrack Boka pamoja na kiungo Edmund John, ambao wote wanatarajiwa kuwa nje kwa vipindi tofauti.

Kwa mujibu wa taarifa kutoka klabu hiyo, majeraha hayo yametokana na majukumu ya mechi za hivi karibuni, hali inayodhihirisha ukubwa wa mzigo waliokuwa nao wachezaji hao. Kukosekana kwao kunalazimisha benchi la ufundi kufanya mabadiliko ya lazima ili kuendelea kusaka matokeo chanya.

Bacca, ambaye ni mhimili katika safu ya ulinzi, anatarajiwa kuwa nje kwa takribani wiki tatu kutokana na jeraha la nyonga. Kukosekana kwake ni pigo kubwa kwa Yanga, hasa kwa kuzingatia mchango wake mkubwa katika kuimarisha ngome ya timu hiyo.

Kwa upande wa Depu na Boka,  wanatarajiwa kukaa nje kwa muda wa wiki mbili kutokana na majeraha ya misuli ya paja na enka mtawalia. Hali hii inaongeza presha katika safu ya ulinzi na ushambuliaji , huku benchi la ufundi likihitaji mbadala wa haraka ili kuzuia pengo hilo kuathiri matokeo ya timu.

Kiungo Edmund John naye yupo nje kwa wiki mbili akitibu jeraha la bega, hali inayopunguza ubunifu na nguvu katikati ya uwanja, Kukosekana kwa viungo wenye ubora kama wake kunaweza kuathiri mtiririko wa mchezo wa Yanga katika mechi zijazo.

Kwa ujumla, Yanga wanakabiliwa na kipindi kigumu kinachohitaji umakini mkubwa wa benchi la ufundi na wachezaji waliobaki. Wakati wao wakihangaika kuziba mapengo, Simba wanaendelea kupandisha presha kileleni mwa msimamo, hali inayoweza kubadilisha kabisa mwelekeo wa mbio za ubingwa kama Yanga hawatarejea haraka kwenye ubora wao.

The post YANGA YAPOROMOKA TARATIBU, SIMBA WAPANDISHA PRESHA appeared first on Soka La Bongo.

from Soka La Bongo https://ift.tt/EsKTVfI
via IFTTT