KOCHA wa Mkuu wa Yanga, Pedro Goncalves, amesisitiza kuwa hataki kuona makosa yaliyojitokeza katika mechi ya kwanza dhidi ya Mbeya City yakijirudia, wakati kikosi chake kitakapokutana tena na wapinzani hao katika mchezo wa mzunguko wa pili wa Ligi Kuu Tanzania Bara.
Yanga itakuwa mwenyeji wa mchezo huo utakaopigwa Alhamisi, Aprili 16, 2026, katika Uwanja wa KMC Complex uliopo Mwenge, Dar es Salaam, ambapo wanatarajia kutumia vyema faida ya uwanja wa nyumbani.
Akizungumza kuelekea mchezo huo, Goncalves ameweka wazi dhamira ya timu yake kuibuka na ushindi, akisisitiza kuwa nidhamu katika kila idara uwanjani ndiyo itakayobeba mafanikio yao.
Kocha huyo ameeleza kuwa kikosi chake kiko katika hali nzuri na kimejiandaa kikamilifu, huku akionyesha imani kubwa kwa wachezaji wake.
Ameongeza kuwa wako tayari kimwili na kiakili kupambana hadi dakika ya mwisho ili kuhakikisha wanapata matokeo chanya.
Pamoja na kujiamini huko, Goncalves hakudharau ubora wa Mbeya City, akisisitiza kuwa mchezo huo hautakuwa mwepesi. “Si mechi rahisi, lakini tuna sababu ya kujiamini kutokana na kiwango chetu cha sasa kwenye ligi,” amesema.
Kuhusu safu ya ushambuliaji, kocha huyo amewataka wachezaji wake kutumia ipasavyo kila nafasi watakayopata, akieleza kuwa mabao ya mapema yatawapa utulivu na kuwavuruga wapinzani. “Umakini mbele ya lango utakuwa silaha yetu kubwa,” amesisitiza.
Kwa upande wa safu ya ulinzi, Goncalves ametoa maelekezo ya kuhakikisha hakuna nafasi zinazotolewa kirahisi kwa wapinzani, akitaka mabeki kucheza kwa umakini na mshikamano mkubwa ili kudhibiti mashambulizi yote.
Yanga inaingia katika mchezo huo ikiwa na morali ya juu na ari ya ushindi, huku Goncalves akiamini kuwa kila mchezaji akitimiza wajibu wake ipasavyo, basi watakuwa na nafasi kubwa ya kupata pointi tatu na kuendelea kujiimarisha katika mbio za ubingwa.
The post SAFU YA USHAMBULIAJI YANGA YABEBA MZIGO, PEDRO ATAKA UMAKINI DHIDI YA MBEYA CITY appeared first on Soka La Bongo.
from Soka La Bongo https://ift.tt/xaSTliG
via IFTTT
Post a Comment